ప్రజాశక్తి- భవానీపురం
జక్కంపూడి పరిసర ప్రాంతాలలో ముంపును నివారించే విధంగా పాముల కాలువను 16.50 లక్షల రూపాయలతో అభివృద్ధి చేస్తున్నామని జిల్లా కలెక్టర్‌ ఎఎండి ఇంతియాజ్‌ అన్నారు. గురువారం జక్కంపూడి సమీపంలో పాములకాలువ ప్రాంతాన్ని కలెక్టర్‌ అధికారులతో కలసి పరిశీలించారు. ఈ సందర్భంగా ఇంతియాజ్‌ మాట్లాడుతూ అధిక వర్షాలలో ముంపు నీరు పాములకాలువ ద్వారా బుడమేరులో కలిసే విధంగా ఈ కాలువను అభివృద్ధి చేస్తున్నామని దీనిద్వారా జక్కంపూడి పరిసర ప్రాంతాలలో ముంపును నివారించవచ్చునని కలెక్టర్‌ అన్నారు. ఇరిగేషన్‌, విజయవాడ మున్సిపల్‌ కార్పొరేషన్‌ ఇంజనీర్లు సంయుక్తంగా ఈ కాలువ అభివృద్ధికి ప్రణాళిక సిద్ధం చేశారని ఇందుకు సంబంధించి 16.50 లక్షల రూపాయలు ప్రభుత్వం మంజూరు చేసిందని కలెక్టర్‌ అన్నారు. కలెక్టర్‌ వెంట విజయవాడ రూరల్‌ తాహశిల్దార్‌ ఎం.రవీంద్రబాబు, ఇరిరేషన్‌ ఏఈ బి.కొండ, వియంసీ ఇంజనీర్‌ మధు, తదితరులు ఉన్నారు.