గండేపల్లి (తూర్పు గోదావరి) : గండేపల్లి మండలం తాళ్లూరు గ్రామ శివారులోని దాబాల వద్ద జాతీయ రహదారిపై కారు అగ్ని ప్రమాదానికి గురై దగ్ధమైన ఘటన సోమవారం చోటు చేసుకుంది. స్థానిక వివరాల మేరకు.. విశాఖపట్నం నుండి రాజమండ్రి వైపు వెళ్తున్న కారు తాళ్లూరు వచ్చేసరికి కారు ముందు భాగం నుండి పొగలు వచ్చాయి. గమనించిన కారు యజమాని రోడ్డు పక్కనే కారును ఆపి దిగి పోవడంతో ఒక్కసారిగా మంటలు ఎగసిపడ్డాయి. సమాచారం అందుకున్న జగ్గంపేట ఫైర్‌ సిబ్బంది హుటాహుటిన సంఘటన స్థలానికి చేరుకొని మంటలను అదుపు చేసే సమయానికి అప్పటికే కారు పూర్తిగా దగ్ధమైందని కారులో ఉన్న వారికి ఏ విధమైన ప్రమాదం జరగలేదని స్థానికులు తెలిపారు.